Panduan Ulaon Adat: Patua Hata Dohot Marhusip

Patua Hata

Pangantusion Ulaon Patua Hata: Ala naung dos roha ni paranak dohot parboru, di ari naung ditontuhon, ro ma paranak dohot manang piga uduranna (dongan tubuna, boru, bere) mandapothon parboru. Diboan do di si sipanganon na marsaudara jala takkas do i dipasahat dohot dihatahon lapatanna tu parboru. Parboru pe dipatupa do dekke laho sipasahatonna tu paranak. Di ulaon i, dijou parboru do manang piga dongan tubuna, boru dohot berena, songon i dongan sahuta. Dung sidung marsipanganon dipungka ma panghataion. Na parjolo, di sungkun parboru ma taringot tu tudu-tudu ni sipanganon naung pinasahat ni paranak tu nasida. Dialusi paranak ma, jala takkas ma didok surung-surung ni parboru ma i. Ditorushon ma muse panghataion, ima na masitariparan hata, lumobi di pangidoan ni paranak di naro nasida patua hata.

Taringot tu ruhut ni panghataion pinatupa do di buku on asa ummura muse ulahononta. Di ari naung tinontuhon ro ma pihak paranak mandapothon parboru. Dung sahat nasida di bagas ni parboru, masijalangan ma nasida, jala dung sidung marsijalangan alai tontong dope jongjong, sahalak namanguluhon sian paranak manang na gabe protokol ima na patandahon rombongan nasida tu parboru, dung sidung sian paranak, biasa na laos songoni do tongtong sian parboru patandahon angka na dohot jongjong dibagas jabu i. Dipasahat paranak ma sipanganon nabinoan nasida i tu pihak parboru, jala dipeakhon di jolo nasida.. songonon ma teknis pelaksanaan na :

Protokol ni Parboru: “Di hamu pamoruonnami, Marga …., na ro mandapothon hami di tikki on Nunga ro hamu mandapothon hami, jadi apala dia do lapatan ni haroromuna, takkas ma paboa hamu.”

Protokol ni Paranak: “Mauliate ma Tulang di haradeon ni roha muna manjangkon haroro nami. Ido tutu Raja nami, sungkun mulani hata sisi mulani uhum, nunga manungkun Rajai di haroro nami tu bagasta na marampang na marjualon. Taringot disungkun-sungkun muna tu hami, posma roha muna Raja nami, ia barita ni haroro nami tu bagas muna on, barita nadenggan jala las ni rohado, panggabean parhorasan do raja nami. Tulang, dipodahon dainang tuhami, ima namboru muna, mandok; molo lao ho amang tu jabu ni Tulangmu, sotung mangembal ho amang, ingkon boanonmu do sipalas roha ni Tulang dohot Nantulangmi. Ido nahuboan hami ditingkion raja nami. Asa disigati pariban nami i ma nian raja nami.”.

Protokol ni Parboru: “Molo songon i do Amangboru, mauliate ma.” (Disuru ma boru nasida manigat nabinoan ni paranak, jala dung disigat, dialusi boru I ma, suman do amang, ninna mangalusi laos didokma asa dipature jala dihobasi nabinoan nasida i).

Protokol ni Paranak: “Di hamu Tulang, molo naung rade hamu, asa ro hami nian mandapothon hamu.” (maksudna laho pasahat tudu-tudu ni sipanganon).

Protokol ni Parboru: “Di hita namardongan tubu, Raja ni Boru, Bere, dohot Raja ni Dongan Sahuta, ala naeng ro ma Raja ni Pamoruonta mandapothon hita, asa rap manjalo ma hita.”

Protokol ni Paranak: “Di hamu Tulang nami (Dang apala didok dope hula-hula) di ari na uli di bulan na denggan on ro do hami pamoruonmuna pasahat tudu-tudu ni sipanganon na marsaudara, tudu-tudu ni panggabean parhorasan ma on di hamu Rajanami. Molo tung songon on pe naboi hupasahat hami di tikki on, las ma rohamu manjalo. “Songon hata ni situa-tua ma dohonon, Huta tano bato parasaran ni leang-leang; Horas ma di hamu na manjalo, horas di hami namangalean. (Diolophon natorop), “horas ma tutu!”.

Protokol ni Parboru: “Di hamu Raja ni Pamoruonnami, hami pe naeng ro ma mandapothon hamu.” Laos digorahon ma boruna nasida asa diboan nalaho sipasahaton nasida, ima dekke simudur-udur.

“Di hamu Raja ni Pamoruonnami, di son hupasahat hami tu hamu dekke simudur-udur, dekke sitio-tio, dekke sahat, dohot pangidoan tu Tuhanta, asa sai mudur-udur ma hamu tu dolok tu toruan, tio ma aek inumonmuna, jala sahat ma angka nauli angka nadenggan di hamu.” (Diolophon angka natorop), “Ima tutu.” (laos masijalangan).

Protokol ni Parboru: “Ala hamu do na ro mandapothonhami Amangboru, ba asa marsipanganon hita, sian hamu ma namamboan tangiang. Hupasahat hami ma tu hamu.”

Protokol ni Paranak: “Nauli ma i Tulang.” (Dipangido ma donganna mambahen tangiang mangan. Jala dung simpul tangiang mangan laos didok ma hata ni sipanganon i); “Sitiptip ma sihompa, golang-golang pangarahutna, Molo tung songon on pe natarpatupa hami, sai godang ma pinasuna.” Marjomutma hita. (Diolophon natorop), “ima tutu!”

Protokol ni Parboru: “Di hita na mardongan tubu, Raja ni Boru, Bere, lumobi di Raja ni Dongan Sahuta, molo tung di jolo ni hasuhuton pe tudu-tudu ni sipanganon on, ba na rap mangadopi ma hita di son.” (Diolophon nasida). Dung i disuru ma pamoruonna maneati aliang-aliang dohot ate-ate ni sipanganon i, somalna nian, sian pamoruan ni paranak do, alai dos ni roha nama i.

Protokol ni Paranak: “Di hita namardongan tubu, suang songon i di Boru, Bere nami, molo tung di jolo ni hasuhuton pe dekke napinasahat ni Raja i, naung rap manjalo ma hita di si ate?” Diolophon uduran ni paranak, “nauli.” (Manariashon, patamahon tu dongan tubuna dohot uduranna taringot tu dekke naung dijalo nasida sian parboru).

Dung Sidung Marsipanganon,

Protokol ni Parboru: “Di hamu Raja ni Pamoruonnami, nangkin takkas do dipasahat hamu tu hami tudu-tudu ni sipanganon na marsaudara. Didok hata ni natua-tua, Andorang so diseat raut jumolo diseat hata.”

“Beha Amangboru, tarsongon dia partording ni tudu-tudu ni sipanganon naung pinasahatmu tu hami?”

Protokol ni Paranak: “Nauli Tulang. Taringot tu tudu-tudu ni sipanganon naung hupasahat hami tu hamu Rajanami, ba surung-surungmuna do i. Botima Tulang!”.

Protokol ini Parboru: “Mauliate Amangboru. Gabe jala horas ma di hamu.”

“Di hita namardongan tubu, Raja ini Boru, Bere, lumobi di Raja ini Dongan Sahuta, nunga takkas husungkun hami Raja ini Pamoruonta, didok nasida ia tudu-tudu ini sipanganon i, ba didok nasida surung-surungta do i. Beha saonari ma tabagi?”

(Dialusi pihak (horong) parboru), “Annon ma tabagi.”

“Antong molo songon i, di hamu Borunami, asa boan hamu jala pature hamu tudu-tudu ni sipanganon on. Unang lupa hamu asa pasahat hamu takkas jambar tu Raja ni Dongan Sahuta, ate!” “Suang songon i di hamu Borunami asa pauli hamu dekke naung takkas tajalo sian Raja i nangkin.”

“Boha Amangboru, nunga boi tatorushon panghataionta?”

Protokol ni Paranak: “Nauli Rajanami.”

Protokol ni Parboru: “Alai mangido tikki hami satongkin, asa jolo mangalap hata jala masipasangapan jolo hami na mardongan tubu.”

Songon on ma hatana: “Di hita na mardongan tubu, Raja ni Boru, Bere, Raja ni Dongan Sahuta, ala naeng mulaanta ma panghataion, asa martangi-tangian hita.

“Jala laos songon i ma di hita namardongan tubu. Songon naung somal taulahon, ala hami haha/anggi muna ma nuaeng songon hasuhuton bolon, jadi hamuma na gabe raja panungkun, raja hata, di ulaonta on. Songon hata ni situa-tua namandok: Molo tinallik huling-huling tarida ma holi-holi. Molo haha/anggi na gabe husuhuton, ba anggina/hahana ma na gabe panamboli.“

(Dijalo haha/anggi ni hasuhuton Parboru ma pangidoan ni suhut (protokol ni Parboru) i. Jala dung takkas masipasangapan, diputushon ma sahalak sian nasida gabe parsinabul/Raja Hata. Langsung ma Parsinabul i makkatai).

Parsinabul ni Parboru: “Mauliate ma dihamu suhutnami. Takkas do dipasangap hamu hami dongan tubumu. Hujalo hami ma pangidoanmuna i. Toho do i tutu, sada songon daion mual do hita nasailaon, si sada anak si sada boru. Sahali nari mauliate ma di suhut nami.”

Laos ditorushon ma panghataion tu Paranak. “Di hamu Raja ni Pamoruon nami, molo dung rade hamu asa tapukka makkatai.”

Protokol ni Paranak: “Nauli Rajanami, alai lehon hamu jolo tikki di hami pamoruonmuna, asa jolo masipasangapan hami namardongan tubu.” (dioloi parboru).

Jala dung dos roha ni paranak, ditontuhon ma sahalak parsinabul nasida. Jala langsung ma Parsinabul i makkatai.

NB: Nian sian mulana pe nunga hira takkas ise na gabe parsinabul, songoni sian pihak parboru suang songoni nang pihak paranak. Alai i do huroha seni dohot pangalaho ni ruhut-ruhut paradaton i, lumobi di na manat mardongan tubu.

Parsinabul ni Paranak: “Tulang Raja Bolon, nunga rade hami.”

Parsinabul ni Parboru: :Mangkatai ma hita Raja ni Boru. Horas ma dihita saluhuna. Jumolo ma tapasahat hamauliateon ni rohanta tu Tuhan pardenggan basa namangiring-iring pardalanan ningolunta, jala napataru hamu pamoruon nami dibagasan hahipason mardongan las ni roha naro jala pajumpang dohot hami hula-hulamuna tong dibagasan hahipason. Mauliate ma di Tuhan ta. Ia nunga marnatappak hita tutu di ingananon, sikkap ni bagas namarampang namarjual, namarsangap namartuaon sigonggom nasa pangisina, bagas pangantaran ni anak dohot pangantaran ni boru, bagas partonggoan ni akka raja, bagas panjaloan ni sangap dohot tua tarlumobi ma panjaloan ni pasu-pasu nasian Tuhan Debata. Ia nunga hundul hita tutu dikursi namarsandaran, songon sikkap ni amak tiar, asa tiarma panggabean tiar nang parhorasan tu hita saluhutna namarhula boru saonari sahat tu joloanon. Amangboru naburju nakkin tutu nunga tung takkas huparsaulihon hami ima sipanganon nabinoan muna i, bosur hami mangan, sangat marlompan juhut na tabo dohot sombu uas minum aek sitio-tio napinarademunai. Asa disi do gandina disi do gandona, disi do daina disi nang tabona, sirsir dohot sirana hona nang asomna. Mauliate ma di hamu. Bakkona mai antong sai jolo ninangnang do asa ninungnung, sai jolo pinangan do asa nisungkun. asa tep-tep do mula ni gondang, serser do mulani tortor. Sise mula ni uhum, sukkun mula ni hata. Namanungkun ma hami tu hamu Raja ni Boru taringot tu sintuhu ni sipanganon naung ta parsaulihon i. Asa diama laklakna diama unokna, dia ma hatana, dia ma nanidokna, sidok boti hami amangboru”.

Parsinabul ni Paranak: Mauliatema tulang nalagu Andorang so hualusi hami sungkun dohot sise ni Raja i, jumolo ma hupasahat hami mauliate malambok pusu sian bagas roha nami tu hamu tulang nami, alani panjalo manang dipanjangkonmu tu hami pamoruonmuna ditingkion. sahalinari, mauliate hudok hami tu hamu. Mauliate ma di Tuhan. Namanukkun manise ma rajai taringot situhu ni sipanganon naso sadia i, tulang naburju molo tung pe songoni dope naboi natarpatupa hami ditingkion ro mandaporhon hamuna hula-hula nami, palias mai raja nami dang tois ni roha nami, molo tung na mangholit pe raja nami, asi ma roha ni Tuhan martamba tamba ma nauli tu ari nanaeng ro, sai ditambai ma pasu-pasuNa, asa boi muse patupaon nami songon palas roha muna diari nanaeng ro, Alani i raja nami songon hata ni natua-tua ma dohononnami Rajanami: Otik si butong-butong, godang si pir ni tondi. Otik so sadia pe na boi hupatupa hami i Rajanami, Sai pamurnas ma i tu daging, saudara ma i tu bohi, Huhut sipasindak panaili. Asa songon nidok ni natua tua do dohonon; tintin ma natinopa, golan-golang do pangarahutna, otik so sadia pe natarpatupatupa hami, sai godang ma pinasuna. Namanungkun ma Rajai di hatani indahan masak dohot lompan na sosadiai. Ia hatana, panggabean parhorasan do Rajanami. Botima raja nami!

Parsinabul ni Parboru: “Mauliate ma Raja ni boru, panggabean parhorasan do hape haroromuna di tikki on. I do nataparsinta, dohonon ma songon hata ni situa-tua: Asa bagot namarhalto niagatan di robean, Horas ma hami namanghasagathon, tu gabena ma hamu namangalean. Asa timbo dolok martimbang, panatapan tu pangaloan, Sai mamasu masu ma amanta debata na ginjang, asa martamba-tamba dihamu nang sinadongan. Alai amangboru, mardakka bulung sihupi, margota bulung demban, markkup do nauli, mardongan do nadenggan. Asa marsiangkup songon nahundul, jala marsidongan songon namardalan. Siakkup ni panggabean parhorasan i amang boru tontu adong ma nanaeng sitaringotan ido na husungkun hami. Namanangkasi ma hami di hamu boru, Asa takkas ma uju ni Purba, tangkasan uju Angkola, Takkas ma tutu hita maduma, tangkasan ma hita luhut mamora. “Sitakkas ni panggabean parhorasan i amangboru, paboa Amangboru tu hami asa adong sibegeon ni pinggol, jala sitiopon diroha. Botima!”

Parsinabul ni Paranak: “Mauliatema tulang nalagu, tohodo songon nidok ni rajai, markkup do nauli, mardongan do nadenggan. Siakkup ni panggabean parhorasan i tutu raja nami ima di haroronami mandapothon hamu, asa takkas ma uju ni Purba, tangkasan uju Angkola, takkas ma tutu hita maduma, tangkasan ma hita luhut mamora. Sitakkas ni panggabean parhorasan takkas ma tutu paboaon tu rajai, didok natua-tua: Tinaba bulu godang laho bahen hite-hite, molo anak/boru nunga magodang denggan ma gabe mar hot ripe, tulang nalagu anak nami bere muna naeng nunga magodang, jala ro mangalu-alu tu hami, paboahon naung takkas masitandaan jala masihaholongan dohot boru ni Raja i sian bagason. Didok tu hami; “Bapatua laho ma hamu mandapothon Tulang Marga (didok margana dohot alamat lengkap), ala nunga masihaholongan hami dohot boru ni Tulang i, jala nunga mardos niroha, satahi sapanghilaan hami laho mamungka pardongan saripeon!” ninna alualuna tu hami Rajanami. Tarsonggot do hami umbege alu-aluna i, nang pe las rohanami. Alana, tingkos do di rohanami, ro anaknami tu bagas muna on. Alai, molo hurimangi hami dirinami tung naso barani dope hami mandapothon Raja i, molo sian keadaannami. Alai, ala las niroha dohot holong do namamboan hami dohot anaknami ro tu jolo ni Rajai di tingkion, jala nunga takkas huida hami, minar-minar do bohimuna manjangkon haroronami, on pe Tulang, molo tung siat elek-elek pangidoannami, asa unang holan hata ni naposo be hata ni nasida naduai, asa tatingkathon nian gabe hata ni angka natua-tua (dipaboa goar ni anakna jala didok goar ni anak boru i). Jadi Tulang, napatua hata ma haroronami di tikki on. Asa i ma elek-elek pangidoan nami. Botima!”

Parsinabul ni Parboru: “Mauliate ma Amangboru. Akkup ni panggabean parhorasan i barita las ni roha do hape. Nakkin didok amangboru tinaba bulu godang laho bahen hite-hite, molo anak/boru nunga magodang denggan ma gabe mar hot ripe. Hami pe amangboru dohonon nami do, asa baringin sabatona, tolu ranting sakkabona, molo anak manang boru naung magodang, denggan ma tutu molo marhasohotan. Nakkin takkas didok amangboruku”

“Asa di hita namardongan tubu, Boru, Bere, suang songoni Raja ni Dongan Sahuta, nunga takkas tabege sian pamoruonta di haroro nasida, i ma di napatua hata. Andorang so nilehon tikki di laho mangido pandapot sian hita, jolo tapatakkas ma jolo borunta, ate, manang natutu do dijalo hata sian anak ni pamoruonta.

“Di hamu borunami, sungkun hamu jolo paribanmu/maenmu.”

NB: Andorang so dialusi boru ni hasuhuton, boi do dikembang-hon angka panghataion. Misalna, didok: Ai borunami na dia, jala ise goarna, dst.

Alus ni boru sian pudi: “Sintong jala tutu do Amang nanidok nasida i.”

Dung i ditorushon ma muse panghataion:

Parsinabul ni Parboru: “Asa di hita namardongan tubu, Boru, Bere, Raja ni Dongan Sahuta nami asa talehon pandapotta. Jala parjolo ma sian dongan tubu, haha doli/anggi doli, Boru, Bere, Dongan Sahuta.”

”Hata sian haha doli/anggi doli, Boru, Bere, Dongan Sahuta manolopi nauli nadenggan sude. Jala ndang apala ris jala sude makkatai, alai porlu do lehonon tikki tu nasida. “Mauliate ma di hamu saluhutna. Jadi nuaeng pe hupasahat ma jolo tu suhut nami di jabu on.

Suhut/Paidua ni Suhut: “Mauliatema, molo sian hami hasuhuton, sian mulana pe nunga takkas hupasahat tu hamu haha/anggi. Sisada hata ma hita, bulung ni dakkana do bulung ni rantingna, ulaon ni hahana do ulaon ni anggina. Ima sian hami hasuhuton. Botima!”

Parsinabul ni Parboru: “Jadi di hamu Raja ni Pamoruonnami, nunga dibege hamu angka pandapot sian hami. Nunga satolop hami asa hujalo hami ma haroromuna di napatua hata. Sai didongani Tuhanta ma hita sude jala dipasu-pasu angka ulaonta. Botima! Horas ma di hita saluhutna.”

Marhusip (Mangarang-rangi)

Ulaon patua hata dohot marhusip nasomal diulahon di tano paserahan, gabe sada ulaon do i (sada paket). Sada tinembak dua hona.

Parsinabul ni Paranak: “Mauliate. Malambok pusu rohanami Tulang, di naung takkas dioloi hamu elek-elek pangidoannami di napatua hata. Sahalinari, mauliate ma di hamu. “Alai Tulang, songon i do huroha pangalahona, molo tung siat muse elek-elek pangidoannami, asa tauduti jala tatingkathon nian tu namarhusip manang mangarang-rangi di angka ulaon na mangihut, na mardomu tu sangkap (rencana) parsaripeon ni anaknami dohot boru ni Raja i, marlambas roha ma Raja i mangoloi pangidoannami. Botima.”

Parsinabul ni Parboru: “Mauliate di Raja ni Pamoruonnami. Andorang so hualusi hami lehon hamu jolo tingki, asa mangalap hata dohot tahi di hami angka namardongan tubu, boru, bere, nang di raja ni dongan sahutanami. Ditariashon ma tu sude horong ni parboru i taringot tu ulaon parhusipon. Jala sude manolopi (setuju). “Ala nunga dos rohanta, mauliate ma!” “I pe di hamu Raja ni Pamoruonnami, taringot tu pangidoanmuna i hujalo hami ma i, manang songon dia husip-husip manang rencanamu. Hupasahat hami ma tikki tu hamu. Botima!”

Parsinabul ni Paranak: “Gabe jala horas ma Tulang. Nunga tamba las ni rohanami. Songon nahudok hami nangkin, di haroronami tu bagasmuna on ala ni alu-alu ni anaknami naung ro tu bagasmuna on, jala sai dihatahon do tu hami haburjuonmuna. Santabi ma Rajanami, didok natua-tua, ida-ida do tu nabutong, jora-jora tu namale. Asa nunga takkas huida hami di haburjuonmuna marboru.”

“Tulang, andorang so hutariashon husip-husip dohot pangidoannami, mangido tikki hami satongkin namarhaha-anggi asa masipasangapan jolo hami, songon i tu boru dohot berenami.”

“Di hita saluhutna, nian andorang laho borhat pe hita tu bagas ni hula-hulanta dijabuon, nunga sada tahi si sada pangidoan hita laho mangelek dohot pasahathon angka pangi-doanta. Beha, ahu ma napasahathot elek-elek pangidoanta?” (Ditolopi sude sian horong ni paranak).

“Di hamu Tulang, Nantulangnami, dohot sude hamu na huparsangapi hami. Sian hami pamoruonmu mangido mangelek hamu, asa tung sangap hamu, Rajanami, alaponnami ma boru ni Raja i sian tonga-tonga ni bagason. Jadi alap jual ma Rajanami, jala ulaon sadari ma nian (paulak une).

“Taringot tu somba ni uhum, somba ni adat manang sinamot, Rajanami, nunga dos rohanami dohot tahinami, asa sisahali mangelekhon, sahali manombahon ma hami tu hamu, Rajanami, sitombol. I ma jolo elek-elek pangidoannami.”

Parsinabul ni Parboru: “Mauliate ma di Raja ni Pamoruonnami. Nunga takkas hubege hami pangidoan muna i, i ma di rencana ulaon alap jual, jala ulaon sadari, dohot di na sisahali manombahon hamu di sinamot ni borunami. Alai, ndang namarhata sinamot do pe hita Amangboru. Songon pangidoanmuna nangkin, namarhusiphusip dope hita di tikki on. Alai nadenggan ma i tutu, ingkon jolo nirangrangan do angka nanaeng ulaonta haduan. Asa hupasahat hami ma jolo panghataion on tu hami na mardongan tubu, boru, berenami, nang di raja ni dongan sahutanami.

Haha/anggi dongan tubu: “Di hamu pamoruonnami, taringot di ulaon alap jual dohot ulon sadari, mauliate ma. Alai molo taringot tu sinamot ni borunami, tung takkas jala godang pasahat hamu, asa las rohanami hula-hulamu, lumobi ma i ala didok hamu di hami do ulaon. Asa ndang apala horbo, hoda dohot angka mas hupangido hami, alai takkas ma godang bahen hamu, Amangboru. Botima!”

Boru, bere, pariban: “Molo sian hami, songon nanidok ni hula-hula/tulangnami nangkin do. Asa las roha nasida, pasahat hamu godang sinamot ni paribannami i. Botima!”

Dongan sahuta: “Mauliate ma di hasuhutonnami di jabuon na mangalehon tikki makkatai tu hami. Sian hami, molo dung dos rohamu, denggan masipaolo-oloan, na marhula marboru asa dapot ma tarida di si songon hata ni natuatua: Bona ni aek puli ma di dolok Sitapongan. Gabe jala dapot ma di hamu angka na uli ala naung takkas masipaolo-oloan., gabe ma jala horas sian hami dongan sahuta, botima.

Parsinabul ni Parboru: “Di hamu Raja ni Pamoruonnami, nunga apala takkas dibege hamu di angka panghataion dohot pangidoan sian hami. Taringot di pangidoanmuna, ulaon sadari, hujalo hami ma i. Alai taringot di sinamot ni borunami, di dok hamu sisahali manombahon, asa tung takkas godang pasahat hamu. Didok natua-tua, Nunga pitu lilinami, paualu jogiannami, Nunga uli nipinami, ai gok ma sinamot di hajutnami. “Ipe Raja ni Boru, huoloi hami ma pangidoanmuna i jala takkas ma hatahon hamu sian i.”

Parsinabul ni Paranak: “Mauliate ma di hamu Rajanami. Suang songon i di paribannami dohot raja ni dongan sahuta ni Raja i. Malambok pusu jala lumbang panghilalaannami di naung takkas dioloi hamu angka pangidoannami. Suang songon i di sinamot ni Boru ni Raja i, na naeng parumaennami, ima sitombol-rambu-pinudun. Ia godang ni sinamot na laho sipasahatonnami Rajanami, Rp 50.000.000 (lima puluh juta rupiah) ma. Asa las ma rohamu jala gabehon hamu ma i Rajanami. Botima!

Parsinabul ni Parboru: “Mauliate ma di Raja ni Pamoruonnami, nunga takkas hubege hamu sinamot ni borunami, godangna Rp 50.000.000. Jadi di hita pe na mardongan tubu, lumobi hasuhutonnami, songon i di boru, bere, dohot dongan sahutanami, ala nunga dos rohanta jala taoloi nangkin pangidoan ni pamoruonta, ba taoloi jala tagabehon ma i.”

“Alai, di hamu Raja ni Pamoruonnami, taringot tu jambar na gok ima suhi ni ampang na opat dohot panandaion, asa takkas muse pasahat hamu tu hami. Taringot tu bilanganna, hupasahat hami ma tu hamu haduan marhite suhutnami.”

Catatan:

Sijalo suhi ampang na opat ima nanidok:

1. Sijalo bara (amang tua/amang uda ni boru muli),
2. Simandokhon/simanggokhon (iboto ni boru muli naung hot ripe, molo so adong boi do sian ama manang ompung martinodohon),
3. Pariban (haha ni boru muli manang namboruna),
4. Tulang (iboto ni inang ni boru muli).

Ia sinamot ndang tarmasuk suhi ni ampang naopat, alai upa suhut ma i langsung tu nampunasa boru muli.

Taringot tu panandaion, boi ma ditorushon tu:

1. Haha-anggi, anak manjae sian namartinohon ni hasuhuton.
2. Ompu suhut ni namuli
3. Ompu bao ni namuli
4. Parorot (namboru ni boru muli)
5. Paidua ni suhut, sian angka ompu namartinodohon, dst.

Parsinabul ni Parboru: “Naporlu muse tahe Amangboru, taringot tu si jalo tintin markkup, tu haha parhundulnami, tulang ni nanaeng helanami, narap paradehon ma hita di ulaon i muse.

Parsinabul ni Paranak: “Nauli ma i, Rajanami.”

Parsinabul ni Parboru: “Di hamu Raja ni Pamoruonnami. Asa dos tuatna, dos nakkokna, molo tung adong sidohonon manang pangidoan mu tu hami. Hupasahat hami ma tikki on tu hamu.”

Parsinabul ni Paranak: “Mauliate ma Rajanami. Adong do sipangidoonnami tu hamu. Namauas jala masihol do hami di angka tangiang dohot pasu-pasu sian hamu Rajanami. Jala molo siat elek-elek pangidoan nami, asa sude ma hami pamoruonmu ulosanmu dohot ulos herbang di ulaon i muse. Songon i ma pangidoan nami.”

Parsinabul ni Parboru: “Pos ma rohamu Amangboru, sude do hamu pasu-pasuon-nami, lumobi di tangiangnami. Alai songon ulos herbang sipasa-haton-nami tu hamu, bilanganna 17 lembar ma. Alai sude do hamu muse dapot ulos nang pe sian ulos-ulos natinonun sadari. “Hombar tusi tahe Amangboru, taringot tu ulos-ulos i dohot pinggan panganan, dos ma rohanta ate, asa masialusi di ibana be ma hita Raja ni Boru?”

Parsinabul ni Paranak: “Mauliate ma Rajanami. Hujalo jala hugabehon hami ma i.”

Parsinabul ni Parboru: “Naporlu muse hata atta ima taringot tu teknis ni ulaon, ari ni ulaonta i, tempat (gedung), angka undangan. Hombar tu si, dumenggan ma pinasahat tu suhut nami di bagas on.

Paidua ni suhut: “Mauliate ma di parsinabulnami. Tarsongon on ma konsep manang rencana nami:

1. Partumpolon di gareja tanggal……., pukul……., .
2. Ting-ting parjolo tanggal ……., ting-ting paduahon tanggal …….,
3. Pamasu-masuon tanggal …….., di gareja (tempat) …….,
4. Ulaon unjuk (pesta) di alaman ni parboru, gedung ……., dst
5. Godang ni undangan tu paranak ……., lembar dst.
6. Dohot angka na asing dope.

Parsinabul ni Parboru: “Mauliate ma di suhutnami. Jadi di hamu Raja ni Pamoruonnami, taringot di angka parjambaran, nasomal i ma ate? Jala sidapot solup ma hamu pamoruonnami. Taringot tu namarsibuha-buhai, laos di bagas on ingananna, jala tamulai ma pukul 08.30 WIB … dst. Boha Raja ni Boru, nunga uli rohamu di si?

Parsinabul ni Paranak: “Nauli jala nunga denggan i Rajanami. Alai, molo boi botoon nian, antar songon dia panjuhuti di ulaon i Rajanami?”

Parsinabul ni Parboru: “Nunga dihusiphon suhutnami. Molo pajjuhuti ima (namar-miak-miak/lombu sito dohot akka sisongoni). I do Amangboru.”

“Ala nunga hira sude tahatai, tarang-rangi di sangkap ni ulaonta, saonari sahat ma hita tu namarhata si gabe-gabe. Hami sian hula-hula ma napasahathon jala mangampu ma sian hamu pamoru-onnami, ate!”.

“Jala, santabi ma hita saluhutna, ala mardalan do tingki, jala ndang pola namangurangi angka holong di hita, dos ma rohanta asa langsung ma pinasahat tu hasuhuton. Botima!

Hasuhuton/Paidua ni Suhut sian Parboru: “Nauli jala nunga denggan i Rajanami. Alai, molo boi botoon nian, antar songon dia panjuhuti di ulaon i Rajanami?”

“Mauliate ma di hita saluhutna, lumobi di Tuhanta. Jumolo hupasahat hami mauliate di dongan tubu, haha/anggi, raja ni boru, bere, dohot raja ni dongan sahuta nami, ima di naung rade rohamu mandongani hami … dst. Suang songon i di pamoruonnami marga .., dohot uduranmuna … dst.

Parsinabul ni Paranak: “Hita pe na ro tu bagasan ni hula-hulanta di son, dos ma rohanta. Molo namangampu hata nauli nadenggan sian hita, langsung ma tu haha/anggi doli hasuhutonnami. Botima!”

Suhut/Paidua ni Suhut sian Paranak: “Mauliate ma di Tuhanta, mauliate ma di hamu sude hula-hula nami, pariban dst…

Parsinabul ni Parboru: “Nunga denggan mardalan ulaonta sadari on, jala nunga godang tahatai, tarangrangi na hombar tusi, jadi asa mardalan ma ingot-ingot (hepeng).

(Nunga diparade hian hepeng laho ingot-ingot i. Dipasahat pihak paranak ma i tu Parsinabul ni Parboru, jala dipaulak ma muse sebagian tu pihak paranak, jala somal taida adong induk ni ingot-ingot i).

Dihatahon ma hepeng ingot-ingot i: “Asa ingot ma hita di angka sangkap dohot ulaonta i.” Diolophon natorop.

NB: Denggan do molo dijahahon angka keputusan naung disurati hian di husip-husip na mangarang-rangi. Boi do sian parboru manang paranak manjahahon keputusan i. Dungi pe baru dibagi hepeng ingot-ingoti. Dijou ma calon pengan-tin, asa masijalangan jala masitandaan dohot angka tutur na ro.

Parsinabul ni Parboru: “Boha Amangboru, ala nunga renta jala singkop be ulaonta, asa taujungi (tatutup) di bagasan ende dohot tangiang. Boha Amangboru, ise ma namanutup?

Parsinabul ni Paranak: “Mauliate ma Rajanami. Sian hamu ma namanutup.”

Parsinabul ni Parboru: “Dos ma rohanta. Ala di son do Amang St…, ba pinasahat ma tu nasida.”

Marende jala ditutup ma dohot tangiang. Sambil mangaso (istirahat) satongkin, manghata-hatai, dihobasi boru ni hasuhuton parboru ma di dapur siboanon ni paranak, ima dekke, songon ulak ni sipanganon nabinoan ni paranak, laos tu panci manang sambongna i ma i dibahen, jala takkas dipasahat tu pihak paranak. Masijalangan ma jala marhehe nauli ma angka tutur. Ima sahatna. Gabe ma jala horas!

Catatan:

Di acara marhusip (mangarang-rangi), molo pangoli naeng mangalap paribanna (boru tulang) laho gabe ripe (isteri), porlu ingoton:

1. Tikki namangelekhon somba ni adat berupa sinamot Parhata ni Paranak, unang be mangihut hata “sitombol” manang “rambu pinudun”, songon i hata “ulaon sadari”. Alana, paribanna do dialap pangoli jala napatio mata ni mualna do i muse. Alai sudena i tu dos ni roha ma.
2. Tulang ni pangoli unang be didok sijalo tintin markkup, alai gabe sijalo surung-surung ma i.
3. Ulaon sadari (paulak une) dipatupa di ari namangihut sesuai tu dos ni roha ni Parboru dohot Paranak.

Khusus tu bentuk ni ulaon taruhon jual (ulaon adat di alaman ni paranak) di tikki namarhusip/mangarang-rangi, asa denggan jala sangap, sian pihak parboru ma parjolo mangido asa paranak paradehon amak tiar dohot angka na hombar tu ulaon adat i. Lapatanna, hata i unang parjolo ditariashon paranak, husip-husip sian suhut paranak tu suhut parboru manang tu parhata ni parboru.

(Sekian).

(dikutip dari berbagai sumber)